Umusirikare wo mu ngabo za Repubulika Iharanira Demokarasi ya Congo (FARDC) yarashe mu cyico mugenzi we wari umukuriye, amuhora kunyereza umushahara we.

Banza Ilunga yishe Capitaine Albert Bosina wari ukuriye imari mu mutwe w’akarere ka gisirikare ka 33 k’ingabo za Congo zirwanira mu mazi.

Yamurasiye mu kigo cya gisirikare cy’ahitwa Karisimbi mu mujyi wa Goma, ku wa Gatatu tariki ya 21 Kanama.

Amakuru avuga ko uyu musirikare atanyuzwe n’ibisobanuro yahawe ubwo yajyaga kubaza ibijyanye n’umushahara amaze amezi 16 adahabwa, ibyatumye ahitamo kwihimura kuri Afande we yarashe amasasu 17.

Nyuma yo kumwivugana yahise ajya kwirega, atabwa muri yombi.